ଭୁବନେଶ୍ୱର : ବିଜୁ ପଟ୍ଟନାୟକଙ୍କ ପରି ଜଣେ ବିଶ୍ୱସ୍ତରୀୟ ବ୍ୟକ୍ତିତ୍ୱଙ୍କୁ କଳଙ୍କିତ କରିବା ପ୍ରୟାସ ଦୁର୍ଭାଗ୍ୟଜନକ ବୋଲି କହିଛନ୍ତି ବିଜେଡି ସାଂସଦ ସଂତୃପ୍ତ ମିଶ୍ର । ଏହା କେବଳ ଅଜ୍ଞତା ନୁହେଁ, ବରଂ ଇତିହାସ ଏବଂ ଘଟଣାବଳୀକୁ ବିକୃତ କରିବା ପାଇଁ ଏକ ସୁଚିନ୍ତିତ ଷଡ଼ଯନ୍ତ୍ର । ବିଜୁ ପଟ୍ଟନାୟକ କେବଳ ଜଣେ ସାଧାରଣ ରାଜନୈତିକ କର୍ମକର୍ତ୍ତା ନଥିଲେ, ଯାହାଙ୍କୁ ଇତିହାସ ବା ଆନ୍ତର୍ଜାତୀୟ ସମ୍ପର୍କ ବିଷୟରେ ଜ୍ଞାନ ନଥିବା ସଂକୀର୍ଣ୍ଣ ମନୋଭାବର ବ୍ୟକ୍ତିମାନେ ଆକଳନ କରିପାରିବେ । ଯେଉଁମାନେ ଆଜି ପ୍ରଶ୍ନ ଉଠାଉଛନ୍ତି, ସେମାନଙ୍କର ଐତିହାସିକ ଜ୍ଞାନର ଘୋର ଅଭାବ ରହିଛି କିମ୍ବା ସେମାନେ ନିଜର ସ୍ୱାର୍ଥ ସାଧନ ପାଇଁ ଇତିହାସକୁ ମନଗଢ଼ା ଭାବେ ବ୍ୟାଖ୍ୟା କରି ଅସଲ ପ୍ରଶ୍ନରୁ ଦୂରେଇ ଯିବାକୁ ଚେଷ୍ଟା କରୁଛନ୍ତି ।
ବିଜୁ ପଟ୍ଟନାୟକଙ୍କୁ ଟାର୍ଗେଟ କରିବା ଏବଂ ତାଙ୍କ ଭୂମିକା ଉପରେ ଆକ୍ଷେପ କରିବା କେବଳ ଭୁଲ ନୁହେଁ, ବରଂ ଏହା ଭାରତର କୂଟନୈତିକ ଇତିହାସ ଏବଂ ପ୍ରତ୍ୟେକ ଓଡ଼ିଆଙ୍କ ଗର୍ବ ଓ ଅସ୍ମିତା ପ୍ରତି ଏକ ଅପମାନ । ଏଭଳି ବିବୃତ୍ତି ଏକ ବିପଜ୍ଜନକ ମନୋଭାବକୁ ଦର୍ଶାଉଛି । ଇତିହାସର କୌଣସି ବିକୃତ ବ୍ୟାଖ୍ୟା ବିଜୁ ପଟ୍ଟନାୟକଙ୍କ ଗୌରବକୁ କମ କରିପାରିବ ନାହିଁ । ତାଙ୍କର ପରିଚୟ ତାଙ୍କର କାର୍ଯ୍ୟ, ତ୍ୟାଗ ଏବଂ ବିଶ୍ୱସ୍ତରୀୟ ସମ୍ମାନ ଉପରେ ଆଧାରିତ । ନକାରାତ୍ମକ ମାନସିକତା ରଖୁଥିବା ବ୍ୟକ୍ତିମାନେ ବିଜୁ ବାବୁ ଓଡ଼ିଶା ଏବଂ ଭାରତ ପାଇଁ କ’ଣ କରିଛନ୍ତି ତାହା ଦେଖି ନପାରିବା, ଆଶ୍ଚର୍ଯ୍ୟଜନକ ନୁହେଁ । ସେ ଥିଲେ ‘ଓଡ଼ିଆ ଅସ୍ମିତା’ର ପ୍ରକୃତ ପ୍ରତୀକ। ଏହି ଅପମାନଜନକ ମନ୍ତବ୍ୟକୁ ତୁରନ୍ତ ପ୍ରତ୍ୟାହାର କରିବାକୁ ଦାବି କରିଛନ୍ତି ସଂତୃପ୍ତ । ଓଡ଼ିଆ ଅସ୍ମିତାକୁ ବଜାୟ ରଖିବା ପାଇଁ ନିଶିକାନ୍ତ ଦୁବେଙ୍କ ମନ୍ତବ୍ୟକୁ ସାର୍ବଜନୀନ ଭାବେ ନିନ୍ଦା କରିବାକୁ, ଓଡ଼ିଶା ବିଜେପି ଏବଂ ବିଜେପି ସରକାରଙ୍କୁ ଆହ୍ୱାନ କରିଛନ୍ତି ସଂତୃପ୍ତ ।
About the Author
