ଅଧ୍ୟକ୍ଷଙ୍କୁ ତାଲା ପକାଇବା ପରେ ହେଲା ସାମୟିକ ସମାଧାନ, ତିହିଡି ଯୁକ୍ତଦୁଇ ବାଣିଜ୍ୟ ବିଭାଗରେ ଅଧ୍ୟାପିକା ନିଯୁକ୍ତି ବିବାଦ
ତିହିଡି, ୨୯.୦୭ : ଭଦ୍ରକ ଜିଲ୍ଲା ତିହିଡି ଯୁକ୍ତଦୁଇ କଲେଜର ବାଣିଜ୍ୟ ବିଭାଗରେ ଅଧ୍ୟାପିକା ନିଯୁକ୍ତି ନେଇ ମାସାଧିକ କାଳ କେତେକ ଛାତ୍ରଛାତ୍ରୀମାନଙ୍କ ମଧ୍ୟରେ ବିବାଦ ଦେଖା ଦେଇ ଆସୁଥିଲା । ମଙ୍ଗଳବାର ଅସନ୍ତୋଷ ଉଗ୍ରରୂପ ନେବା ସହ ଅଧ୍ୟକ୍ଷଙ୍କ ତାଲା ପକାଇ କିଛି ଘଣ୍ଟା ରଖିବା ପରେ ଏହାର ସାମୟିକ ସମାଧାନ ହୋଇଥିବା ଜଣାଯାଇଛି । ଗତବର୍ଷ ଛୁକ୍ତି ଭିକ୍ତିକ(ଗେଷ୍ଟ ଫେକଲ୍ଟି) ପ୍ରକ୍ରିୟା ନିଯୁକ୍ତି ପାଇ ପାଠ ପଢାଉଥିବା ଅଧ୍ୟାପିକାଙ୍କୁ ପୂନଃ କାର୍ଯ୍ୟ କରିବାକୁ ଅଧ୍ୟକ୍ଷ ପ୍ରତିଶୃତି ଦେବାପରେ ଛାତ୍ରଛାତ୍ରୀମାନେ ପ୍ରତିବାଦରୁ ଓହରିଥିବା ଜଣାଯାଇଛି । ଏହି କଲେଜରେ ସମସ୍ତ ବିଷୟ ପାଇଁ ମାତ୍ର ଜଣେ ଅଧ୍ୟାପିକା ଚୁକ୍ତି ଭିତ୍ତିକ ଅର୍ଥାତ୍ ଗେଷ୍ଟ ଫେକଲ୍ଟି ନିୟୋଜିତ ହୋଇଛନ୍ତି । ଯାହାଙ୍କୁ କେତେକ ଛାତ୍ରଛାତ୍ରୀ ଏହାକୁ ଗ୍ରହଣ କରି ପାଠ ପଢୁଥିବା ବେଳେ କେତେକ ଛାତ୍ରଛାତ୍ରୀ କ୍ଲାସ ବର୍ଜନ କରି ଆସୁଛନ୍ତି । ତାଙ୍କ ପାଠ ପଢାଇବା ଶୈଳୀରେ ସେମାନେ ସନ୍ତୁଷ୍ଟ ନୁହଁନ୍ତି । ତାଙ୍କ ବିରୋଧରେ ଅଧ୍ୟକ୍ଷଙ୍କ ନିକଟରେ ବାରମ୍ବାର ଅଭିଯୋଗ କରି ଆସୁଥିଲେ ମଧ୍ୟ କୌଣସି ସମାଧାନ ହୋଇନଥିଲା । ଯାହାକୁ ନେଇ ସେମାନେ ଦିନକୁ ଦିନ ଅସନ୍ତୋଷ ବ୍ୟକ୍ତ କରି ଆସୁଛନ୍ତି । କଲେଜରେ ଶୈକ୍ଷିକ ଫେରାଇ ଆଣିବା, ସଂପ୍ରତି ପାଠ ପଢାଉଥିବା ଅଧ୍ୟାପିକାଙ୍କୁ ଅପସରଣ କରିବା, ଚଳିତ ଶିକ୍ଷା ବର୍ଷ ପାଇଁ ଫେକଲ୍ଟି ନିଯୁକ୍ତି ପାଇଁ ଖୋଲା ବିଜ୍ଞାପନ କରି ଦକ୍ଷ ଓ ଯୋଗ୍ୟ ବିବେଚିତଙ୍କୁ ଚୟନ କରିବା, ନୂତନ ନିଯୁକ୍ତି ହେବା ପର୍ଯ୍ୟନ୍ତ ଏହି କଲେଜରୁ ଅବସର ଗ୍ରହଣ କରିଥିବା କୌଣସି ଅଧ୍ୟାପକଙ୍କୁ ଅସ୍ଥାୟୀ ଭାବେ ଶିକ୍ଷାଦାନ ପାଇଁ ଅନୁମତି ଦେବା ଆଦି କରାଯାଇଛି । ତେବେ ଅବସରପ୍ରାପ୍ତ ଅଧ୍ୟାପକମାନଙ୍କ ମଧ୍ୟରୁ କାହାରିଙ୍କୁ ନିଯୁକ୍ତି ଦିଆଯିବାର ନିୟମ ନଥିବା କହିଛନ୍ତି ଅଧ୍ୟକ୍ଷ ଦୀନବନ୍ଧୁ ଗାହାଣ । ଅନ୍ୟପଟେ ଛାତ୍ରଛାତ୍ରୀମାନଙ୍କ ଆନ୍ଦୋଳନାତ୍ମକ ପରିସ୍ଥିତିର ମୁକାବିଲା କରିବା ଲାଗି ପୂର୍ବରୁ ଗେଷ୍ଟ ଫେକଲ୍ଟିରେ ନିଯୁକ୍ତି ହୋଇଥିବା ଅଧ୍ୟାପିକାଙ୍କୁ ବୁଧବାର ଠାରୁ ନୂତନ ନିଯୁକ୍ତି ହେବା ପର୍ଯ୍ୟନ୍ତ ସାମୟିକ ଭାବେ ପାଠ ପଢାଇବେ ବୋଲି ଛାତ୍ରଛାତ୍ରୀମାନଙ୍କୁ ପ୍ରତିଶୃତି ଦେଇଛନ୍ତି । ସୂଚନା ମୁତାବକ, ଏହି ଯୁକ୍ତଦୁଇ କଲେଜଟି ବ୍ଲକ ଗ୍ରାଣ୍ଟ ଅର୍ନ୍ତଭୁକ୍ତ । ବାଣିଜ୍ୟ ବିଭାଗର ଦୁଇ ଜଣ ଅଧ୍ୟାପକ ଥିଲେ । ଗତ ୨୪ ମସିହାରେ ଜଣେ ଅବସର ଗ୍ରହଣ କରିଥିବା ବେଳେ ଚଳିତ ବର୍ଷ ମଧ୍ୟ ଅନ୍ୟଜଣେ ଅବସର ଗ୍ରହଣ କରିଛନ୍ତି । ଯାହା ଫଳରେ ଶିକ୍ଷାଦନ କରିବା ଠପ୍ ହୋଇଯାଇଛି । ଚଳିତ ଶିକ୍ଷା ବର୍ଷ ଜୁନ୍ ମାସ ଠାରୁ ଆରମ୍ଭ ହୋଇଛି । ଦ୍ୱିତୀୟ ବର୍ଷର ଛାତ୍ରଛାତ୍ରୀ ଶହେରୁ ଉର୍ଦ୍ଧ ଥିବାବେଳେ ପ୍ରଥମ ବର୍ଷ ପାଇଁ ମଧ୍ୟ ଆଡ୍ମିଶନ ମଧ୍ୟ ଆରମ୍ଭ ହୋଇଛି । ମାତ୍ର କୌଣସି ନିୟମ ନଥାଇ ଜଣେ ଅଧ୍ୟାପିକାଙ୍କୁ ଖୋଦ୍ ଅଧ୍ୟକ୍ଷ ନିଯୁକ୍ତି ଦେଇଥିବା ଜଣାଯାଇଛି । ଛାତ୍ରଛାତ୍ରୀମାନଙ୍କ ପକ୍ଷରୁ ବିବାଦ ସୃଷ୍ଟି ହେବାରୁ ତରବରିଆ ଭାବେ ଏକ ନିଦ୍ଦିଷ୍ଟ ଖବର କାଗଜରେ ବିଜ୍ଞାପନ ଦିଆଯାଇଛି । ତେବେ ଏତେସବୁ ସମସ୍ୟ ମଧ୍ୟରେ ଘାଣ୍ଟି ହେଉଥିବା କଲେଜ ଅଧ୍ୟକ୍ଷ ଉପରିସ୍ଥ ପଦାଧିକାରୀଙ୍କୁ ଅବଗତ କରିଛନ୍ତି କି ନାହିଁ ତାହା ଏକ ବଡ ପ୍ରଶ୍ନ ସୃଷ୍ଟି ହୋଇଛି । ସେହିପରି ଛାତ୍ରଛାତ୍ରୀମାନଙ୍କ ପକ୍ଷରୁ ତାଲା ପକାଇବା ଘଟଣାରେ ଅଧ୍ୟକ୍ଷ ସ୍ଥାନୀୟ ପୋଲିସକୁ ଅବଗତ କରିନଥିବା ପଛରେ ରହସ୍ୟ କ’ଣ ଏବ ଆଗାମି ଦିନରେ ଯଦି କୌଣସି ବଡ ଧରଣର ବିବାଦ ହୁଏ ସେଥିପାଇଁ କିଏ ଦାୟୀ ହେବ ବୋଲି ମଧ୍ୟ ଆଚଲୋଚନା ହେଉଛି । ତେବେ ସେ ଯାହା ହେଉନା କାହିଁକି ଏଭଳି ବିବାଦମାନ ଘଟଣାରେ ଉଚ୍ଚ ଶିକ୍ଷା ବିଭାଗ ଏବଂ କଲେଜ ପରିଚାଳନା କମିଟିର ସଭାପତି ତଥା ଉପଜିଲ୍ଲାପାଳ ତଦନ୍ତ କରି ତ୍ୱରିତ ପଦକ୍ଷେପ ନେବାକୁ ସାଧାରଣରେ ଦାବୀ କରାଯାଇଛି ।