ତିହିଡି କଲେଜ ବାଣିଜ୍ୟ ବିଭାଗର ଅଧ୍ୟାପକ ନିଯୁକ୍ତି ପ୍ରସଙ୍ଗରେ ଅଧ୍ୟକ୍ଷଙ୍କୁ ତାଲା ପକାଇଲେ ଛାତ୍ରଛାତ୍ରୀ

ତିହିଡି କଲେଜ ବାଣିଜ୍ୟ ବିଭାଗର ଅଧ୍ୟାପକ ନିଯୁକ୍ତି ପ୍ରସଙ୍ଗରେ ଅଧ୍ୟକ୍ଷଙ୍କୁ ତାଲା ପକାଇଲେ ଛାତ୍ରଛାତ୍ରୀ । ଭଦ୍ରକ ଜିଲ୍ଲା ତିହିଡି ଯୁକ୍ତଦୁଇ କଲେଜର ବାଣିଜ୍ୟ ବିଭାଗରେ ଅଧ୍ୟାପିକା ନିଯୁକ୍ତି ନେଇ ମାସାଧିକ କାଳ କେତେକ ଛାତ୍ରଛାତ୍ରୀମାନଙ୍କ ମଧ୍ୟରେ ବିବାଦ ଦେଖା ଦେଇ ଆସୁଥିଲା । ମଙ୍ଗଳବାର ଅସନ୍ତୋଷ ଉଗ୍ରରୂପ ନେବା ସହ ଅଧ୍ୟକ୍ଷଙ୍କ ତାଲା ପକାଇ କିଛି ଘଂଟା ରଖିବା ପରେ ଏହାର ସାମୟିକ ସମାଧାନ ହୋଇଥିବା ଜଣାଯାଇଛି । ଗତବର୍ଷ ଗେଷ୍ଟ ଫେକଲ୍ଟିରେ ନିଯୁକ୍ତି ପାଇ ପାଠ ପଢାଉଥିବା ଅଧ୍ୟାପିକାଙ୍କୁ ପୂନଃ କାର୍ଯ୍ୟ କରିବାକୁ ଅଧ୍ୟକ୍ଷ ପ୍ରତିଶୃତି ଦେବାପରେ ଛାତ୍ରଛାତ୍ରୀମାନେ ପ୍ରତିବାଦରୁ ଓହରିଥିବା ଜଣାଯାଇଛି । ଏହି କଲେଜରେ ସମସ୍ତ ବିଷୟ ପାଇଁ ମାତ୍ର ଜଣେ ଅଧ୍ୟାପିକା ଚୁକ୍ତି ଭିତ୍ତିକ ଅର୍ଥାତ୍ ଗେଷ୍ଟ ଫେକଲ୍ଟି ନିୟୋଜିତ ହୋଇଛନ୍ତି । ଯାହାଙ୍କୁ କେତେକ ଛାତ୍ରଛାତ୍ରୀ ଏହାକୁ ଗ୍ରହଣ କରି ପାଠ ପଢୁଥିବା ବେଳେ କେତେକ ଛାତ୍ରଛାତ୍ରୀ କ୍ଲାସ ବର୍ଜନ କରି ଆସୁଛନ୍ତି । ତାଙ୍କ ପାଠ ପଢାଇବା ଶୈଳୀରେ ସେମାନେ ସନ୍ତୁଷ୍ଟ ନୁହଁନ୍ତି । ତାଙ୍କ ବିରୋଧରେ ଅଧ୍ୟକ୍ଷଙ୍କ ନିକଟରେ ବାରମ୍ବାର ଅଭିଯୋଗ କରି ଆସୁଥିଲେ ମଧ୍ୟ କୌଣସି ସମାଧାନ ହୋଇନଥିଲା । ଯାହାକୁ ନେଇ ସେମାନେ ଦିନକୁ ଦିନ ଅସନ୍ତୋଷ ବ୍ୟକ୍ତ କରି ଆସୁଛନ୍ତି । ସୂଚନା ମୁତାବକ, ଏହି ଯୁକ୍ତଦୁଇ କଲେଜଟି ବ୍ଲକ ଗ୍ରାଂଟଣ୍ଟ ଅର୍ନ୍ତଭୁକ୍ତ । ବାଣିଜ୍ୟ ବିଭାଗର ଦୁଇ ଜଣ ଅଧ୍ୟାପକ ଥିଲେ । ଗତ ୨୪ ମସିହାରେ ଜଣେ ଅବସର ଗ୍ରହଣ କରିଥିବା ବେଳେ ଚଳିତ ବର୍ଷ ମଧ୍ୟ ଅନ୍ୟଜଣେ ଅବସର ଗ୍ରହଣ କରିଛନ୍ତି । ଯାହା ଫଳରେ ଶିକ୍ଷାଦନ କରିବା ଠପ୍ ହୋଇଯାଇଛି । ସମସ୍ୟା ମଧ୍ୟରେ ଘାଂଟିି ହେଉଥିବା କଲେଜ ଅଧ୍ୟକ୍ଷ ଉପରିସ୍ଥ ପଦାଧିକାରୀଙ୍କୁ ଅବଗତ କରିଛନ୍ତି କି ନାହିଁ ତାହା ଏକ ବଡ ପ୍ରଶ୍ନ ସୃଷ୍ଟି ହୋଇଛି । ସେହିପରି ଛାତ୍ରଛାତ୍ରୀମାନଙ୍କ ପକ୍ଷରୁ ତାଲା ପକାଇବା ଘଟଣାରେ ଅଧ୍ୟକ୍ଷ ସ୍ଥାନୀୟ ପୋଲିସକୁ ଅବଗତ କରିନଥିବା ପଛରେ ରହସ୍ୟ କ’ଣ ଏବ ଆଗାମି ଦିନରେ ଯଦି କୌଣସି ବଡ ଧରଣର ବିବାଦ ହୁଏ ସେଥିପାଇଁ କିଏ ଦାୟୀ ହେବ ବୋଲି ମଧ୍ୟ ଆଚଲୋଚନା ହେଉଛି । ଉଚ୍ଚ ଶିକ୍ଷା ବିଭାଗ ଏବଂ କଲେଜ ପରିଚାଳନା କମିଟିର ସଭାପତି ତଥା ଉପଜିଲ୍ଲାପାଳ ତଦନ୍ତ କରି ତ୍ୱରିତ ପଦକ୍ଷେପ ନେବାକୁ ସାଧାରଣରେ ଦାବୀ କରାଯାଇଛି ।