ଚର୍ଚ୍ଚାରେ କଷାଫଳ ଗ୍ରାମ ପଞ୍ଚାୟତରେ ବିଧାୟକ ମାନସ ଦତ୍ତଙ୍କ ରାତ୍ରୀକାଳୀନ ପ୍ରବାସ, ବିକାଶ ମୂଳକ କାର୍ଯ୍ୟର ସମୀକ୍ଷା ସହ ଏକାଧିକ ପ୍ରକଳ୍ପ ପାଇଁ ଦେଲେ ଶିଳାନ୍ୟାସ

ବାଲେଶ୍ଵର ସଦର ନିର୍ବାଚନମଣ୍ଡଳୀର କଷାଫଳ ଗ୍ରାମ ପଞ୍ଚାୟତରେ ବିକାଶ ମୂଳକ କାର୍ଯ୍ୟର ସମୀକ୍ଷା ସହ ଏକାଧିକ ଜନକଲ୍ୟାଣକାରୀ ପ୍ରକଳ୍ପର ଶିଳାନ୍ୟାସ କରିଛନ୍ତି ବିଧାୟକ ମାନସ କୁମାର ଦତ୍ତ।

ଏହି ଅବସରରେ ଜନସାଧାରଣଙ୍କ ସମସ୍ୟା ନିରାକରଣ ସମ୍ବନ୍ଧୀୟ ଆଲୋଚନା ପାଇଁ ପଞ୍ଚାୟତରେ ବିଧାୟକଙ୍କ ରାତ୍ରୀକାଳୀନ ପ୍ରବାସ ଚର୍ଚ୍ଚାର ବିଷୟ ପାଲଟିଛି। ଏହି ପ୍ରବାସ ଅନ୍ତର୍ଗତ ବୁଧବାର ସନ୍ଧ୍ୟାରେ ଆୟୋଜିତ ଏକ ସାଂଗଠନିକ ବୈଠକରେ ବିଧାୟକ ଶ୍ରୀ ଦତ୍ତ ଯୋଗ ଦେଇ କେନ୍ଦ୍ର ଓ ରାଜ୍ୟ ସରକାରଙ୍କ ସମସ୍ତ ଲୋକ କଲ୍ୟାଣ ଯୋଜନାର ସୁଫଳ ତୃଣମୂଳସ୍ତରରେ ପହଞ୍ଚାଇବାକୁ ଉଦ୍ୟମ କରିବାକୁ ପରାମର୍ଶ ଦେଇଥିଲେ ।

ପରେ ସ୍ଥାନୀୟ ଅଞ୍ଚଳବାସୀଙ୍କ ସହ କଷାଫଳ ପଞ୍ଚାୟତର ବିଭିନ୍ନ ସମସ୍ୟା ଓ ତାହାର ନିରାକରଣ ସମ୍ପର୍କରେ ଆଲୋଚନା କରିଥିଲେ। ସେହିପରି ଗୁରୁବାର ସକାଳେ ରାଜ୍ୟ ସରକାରଙ୍କ ବିକଶିତ ଗାଁ ବିକଶିତ ଓଡ଼ିଶା ଯୋଜନା ଅନ୍ତର୍ଗତ ଏକାଧିକ ପ୍ରକଳ୍ପ ପାଇଁ ବିଧାୟକ ଶିଳାନ୍ୟାସ କରିଥିଲେ। ଏଥିରେ ମୋଟ ସାଢେ ୧୭ ଲକ୍ଷ ଟଙ୍କାର ୫ଗୋଟି ପ୍ରକଳ୍ପ କାର୍ଯ୍ୟର ଶିଳାନ୍ୟାସ କରାଯାଇଥିଲା। ଏହା ପରେ ସ୍ଥାନୀୟ ଟୁରିଷ୍ଟ ପଏଣ୍ଟ ଠାରେ ବିଭିନ୍ନ ଉନ୍ନତିମୂଳକ କାର୍ଯ୍ୟର ସମୀକ୍ଷା କରିଥିଲେ ବିଧାୟକ ଶ୍ରୀ ଦତ୍ତ। ଏଥିରେ ଟିପିଏନଓଡିଏଲ କର୍ତ୍ତୃପକ୍ଷଙ୍କ ସହ ଜଳସେଚନ ଓ ଜଳ ନିଷ୍କାସନ ବିଭାଗର ଅଧିକାରୀମାନେ ଯୋଗ ଦେଇଥିଲେ। କଷାଫଳ ପଞ୍ଚାୟତରେ ଦେଖା ଦେଉଥିବା ବିଦ୍ୟୁତ ଯୋଗାଣ ସମସ୍ୟାକୁ ନେଇ ବିଧାୟକ ଶ୍ରୀ ଦତ୍ତ ଉଦବେଗ ପ୍ରକାଶ କରିଥିଲେ।

ଆଗାମୀ ମାସକ ମଧ୍ୟରେ ବିଦ୍ୟୁତ୍ ସରବରାହ ସ୍ଵାଭାବିକ ହେବ ବୋଲି ଟିପିଏନଓଡିଏଲ କର୍ତ୍ତୃପକ୍ଷ ଏହି ସମୀକ୍ଷା ବୈଠକରେ ପ୍ରତିଶୃତି ଦେଇଥିଲେ। ଅନୁରୂପ ଭାବେ ବନ୍ୟା ନିୟନ୍ତ୍ରଣ ପାଇଁ ନୂତନ ପଥର ବନ୍ଧ ନିର୍ମାଣ ପାଇଁ ଯୋଜନା ପ୍ରସ୍ତୁତ କରିବାକୁ ବିଧାୟକ ଶ୍ରୀ ଦତ୍ତ ଜଳସେଚନ ବିଭାଗ ଅଧିକାରୀଙ୍କୁ ପ୍ରସ୍ତାବ ଦେଇଥିଲେ। ଏହାପରେ ବିଧାୟକ ସ୍ଥାନୀୟ ସାରଙ୍ଗଦେବ ବେଳାଭୂମିରେ ପହଞ୍ଚି ସେଠାକାର ସ୍ଥିତି ଅନୁଧ୍ୟାନ କରିଥିଲେ। ସମ୍ପ୍ରତି ସାରଙ୍ଗଦେବ ବେଳାଭୂମିକୁ ରାଜ୍ୟ ସରକାର ପର୍ଯ୍ୟଟନ କ୍ଷେତ୍ରର ମାନ୍ୟତା ଦେଇଥିବା ବେଳେ ୨କୋଟି ଟଙ୍କାର ଅନୁଦାନ ମଞ୍ଜୁର କରିଛନ୍ତି। ଏହି ଅର୍ଥରେ ସାରଙ୍ଗ ମହାଦେବ ମନ୍ଦିରର ଉନ୍ନତିକରଣ ସହିତ ବେଳାଭୂମିକୁ ବିକଶିତ କରାଯିବ ବୋଲି ବିଧାୟକ ଶ୍ରୀ ଦତ୍ତ କହିଥିଲେ। ଏହି ସମୟରେ ଜଳ ସଂପଦ, ଟିପିଏନଓଡିଏଲ କର୍ତ୍ତୃପକ୍ଷଙ୍କ ସହ ପର୍ଯ୍ୟଟନ ବିଭାଗର ଅଧିକାରୀମାନେ ଉପସ୍ଥିତ ଥିଲେ। କଷାଫଳ ସରପଞ୍ଚ ଜୟନ୍ତୀ ଆଦିକ, ପଞ୍ଚାୟତ ସମିତି ସଭ୍ୟା ପ୍ରିୟଙ୍କା ଜେନା, ଲୋକନାଥ ଭୂୟାଁ, ନାଏବ ସରପଞ୍ଚ ପ୍ରିୟରଞ୍ଜନ ପୃଷ୍ଟି, ମୁକୁନ୍ଦ ଆଦିକ, ମନ୍ମଥ ବେହେରାଙ୍କ ସହ ଅଶୋକ ରଣା, ହରେକୃଷ୍ଣ ଖଣ୍ଡା, ସୁଶାନ୍ତ ପରିଡ଼ା, ସତ୍ୟଜିତ ଜେନା, ଶମ୍ଭୁନାଥ ସାବଲ, ହରିଶ୍ଚନ୍ଦ୍ର ଦଳେଇ, ବେଣୁଧର ସେଠୀ, ହେମନ୍ତ ପରିଡ଼ା, ନିରଞ୍ଜନ ସାସମଲ, ମଦନ ମୋହନ ସାହୁ, ପ୍ରଭାତ ବେହେରା, ପ୍ରଭାସ ପାତ୍ର, ପୂର୍ଣ୍ଣ ସାସମଲ, ବେଣୁଧର ମଲ୍ଲିକ, ରବୀନ୍ଦ୍ର ମାନ୍ନା, ହରେକୃଷ୍ଣ ମାନ୍ନା, ଆନନ୍ଦ ପରିଡ଼ା ପ୍ରମୁଖ ଉପସ୍ଥିତ ରହି ସମସ୍ତ କାର୍ଯ୍ଯ ପରିଚାଳନା କରିଥିଲେ।