ରୋଷେଇରେ ସ୍ୱାଦ ବଢ଼ାଇବା ପାଇଁ ପ୍ୟାକେଟ୍ ମସଲା ବ୍ୟବହାର କରୁଥିବା ଗ୍ରାହକଙ୍କ ପାଇଁ ବଡ଼ ଖବର । ଲୋକପ୍ରିୟ ମସଲା ବ୍ରାଣ୍ଡ୍ Everestର କିଛି ଉତ୍ପାଦକୁ ନେଇ ଭାରତୀୟ ଖାଦ୍ୟ ସୁରକ୍ଷା ଓ ମାନକ ପ୍ରାଧିକରଣ (FSSAI) ପକ୍ଷରୁ ଯାଞ୍ଚ ଏବଂ ନିୟମ ଉଲ୍ଲଂଘନ ସମ୍ପର୍କିତ ପଦକ୍ଷେପ ନିଆଯାଇଛି । ଯାଞ୍ଚ ସମୟରେ ଘରୋଇ କମ୍ପାନୀ ହେଙ୍ଗୁକୁ ନେଇ ଲେବଲିଂ ସମ୍ପର୍କିତ ଅନିୟମିତତା ସହ କିଛି ଗୁଣବତ୍ତା ସମସ୍ୟା ଚିହ୍ନଟ ହୋଇଥିବା ଦାବି କରାଯାଇଛି । ଏହା ସହିତ ଏଭରେଷ୍ଟର ଆଉ କିଛି ମସଲାରେ ମଧ୍ୟ ଖାଦ୍ୟ ସୁରକ୍ଷା ନିୟମ ଉଲ୍ଲଂଘନ ନେଇ ପ୍ରଶ୍ନ ଉଠିଛି ।
FSSAIର ଯାଞ୍ଚରେ ଏଭରେଷ୍ଟର ହେଙ୍ଗୁକୁ ନେଇ ଭୁଲ୍ ଭାବେ ବ୍ରାଣ୍ଡିଂ ଏବଂ ଗୁଣବତ୍ତା ସମ୍ପର୍କିତ ଆପତ୍ତି ରହିଛି । ଏହା ବ୍ୟତୀତ ନିମ୍ନଲିଖିତ ମସଲାଗୁଡ଼ିକୁ ନେଇ ମଧ୍ୟ ନିୟମ ଉଲ୍ଲଂଘନ ହେଉଛି । ଏଭରେଷ୍ଟ କମ୍ପାନୀର ଏଗ୍ କରୀ ମସଲା, ଚିକେନ ମସଲା, ଏବଂ ଗରମ ମସଲାକୁ ନେଇ ଗୁଣବତ୍ତାରେ କିଛି ସମସ୍ୟା ରହିଛି । ତେଣୁ ଏନେଇ FSSAI ନୋଟିସ ଜାରି କରି ଜବାବ ମାଗିଛି । ନିୟମ ଉଲ୍ଲଂଘନକୁ ନେଇ ଲାଲଜୀ ଗୋଧୁ ଆଣ୍ଡ କମ୍ପାନୀକୁ ମଧ୍ୟ ଅଲଗା ଭାବେ ସତର୍କ କରାଯାଇଛି ।
FSSAI ପ୍ୟାକେଟ୍ ଖାଦ୍ୟ ପାଇଁ ନୂଆ ଫ୍ରଣ୍ଟ-ଅଫ୍-ପ୍ୟାକ୍ ଚେତାବନୀ ଲେବଲ୍ ଆଣିବା ନେଇ ପ୍ରସ୍ତାବ ରଖିଛି । ଏହି ବ୍ୟବସ୍ଥା ଅନୁସାରେ ପ୍ୟାକେଟର ସାମ୍ନା ଭାଗରେ ଏକ ଲାଲ ରଙ୍ଗର ଷଡ଼ଭୁଜାକାର ଚିହ୍ନ ରହିପାରେ । ଏହି ଚିହ୍ନ ମାଧ୍ୟମରେ ଖାଦ୍ୟରେ ଅଧିକ ପରିମାଣର ଚିନି, ଲୁଣ କିମ୍ବା ସ୍ୟାଚୁରେଟେଡ୍ ଫ୍ୟାଟ୍ ରହିଛି କି ନାହିଁ, ତାହା ଗ୍ରାହକମାନେ ସହଜରେ ଜାଣିପାରିବେ । ଫଳରେ କୌଣସି ପ୍ୟାକେଟ୍ ଖାଦ୍ୟ କିଣିବା ପୂର୍ବରୁ ତାହାର ପୋଷଣ ସମ୍ପର୍କିତ ସୂଚନା ବୁଝିବା ସହଜ ହେବ ।
About the Author
