ବାଲେଶ୍ୱର ସଦର ବିଜେପି କାର୍ଯ୍ୟାଳୟରେ ପାଳିତ ହେଲା ରକ୍ଷାବନ୍ଧନ ଉତ୍ସବ, ପୂର୍ବତନ ସୈନିକଙ୍କୁ ରାକ୍ଷୀ ବାନ୍ଧିଲେ ମହିଳା ମୋର୍ଚ୍ଚାର ସଦସ୍ୟା

ପବିତ୍ର ରାକ୍ଷୀ ପୂର୍ଣ୍ଣିମା ଅବସରରେ ସଦର ବିଜେପି କାର୍ଯ୍ୟାଳୟରେ ରକ୍ଷାବନ୍ଧନ ଉତ୍ସବ ପାଳିତ ହୋଇଯାଇଛି । ଏଥିରେ ବିଜେପି ସଦସ୍ୟାମାନେ ଦଳୀୟ କାର୍ଯ୍ୟକର୍ତ୍ତାଙ୍କ ସହିତ ଭୂତପୂର୍ବ ସୈନିକଙ୍କ ହାତରେ ରାକ୍ଷୀ ବାନ୍ଧିଥିଲେ । ସଦର ବିଧାୟକ ମାନସ କୁମାର ଦତ୍ତ ଏଥିରେ ଯୋଗଦେଇ ପୂର୍ବତନ ସୈନିକଙ୍କ ମାନଙ୍କ ସହ ରକ୍ଷାବନ୍ଧନ ଉତ୍ସବ ପାଳନର ଆଭିମୁଖ୍ୟ ସମ୍ପର୍କରେ ସୂଚନା ଦେଇଥିଲେ । ଭାରତୀୟ ସଂସ୍କୃତି ଓ ପରମ୍ପରାରେ ରକ୍ଷାବନ୍ଧନର ମହତ୍ୱ, ଭାଇ ଭଉଣୀଙ୍କ ମଧ୍ୟରେ ସମ୍ପର୍କରେ ପବିତ୍ର ସୁତ୍ର ଉପରେ ସେ ଆଲୋକପାତ କରିଥିଲେ । ଶ୍ରଦ୍ଧା ଓ ସ୍ନେହର ପର୍ବ ଭାବେ ଭାଇ-ଭଉଣୀଙ୍କ ପବିତ୍ର ସମ୍ପର୍କରେ ପ୍ରତୀକ ଭାବେ ପାଳିତ ହେଉଥିବା ଏହି ରକ୍ଷାବନ୍ଧନ ଉତ୍ସବ ଆମ ସଂସ୍କୃତିର ମହାନତାକୁ ସର୍ବଦା ପ୍ରତିପାଦିତ କରିଆସିଛି । ବହୁ ପୂରାତନ କାଳରୁ ଭାରତୀୟ ପରମ୍ପରାରେ ଭାଇ ହାତରେ ଭଉଣୀମାନେ ରାଖୀ ବାନ୍ଧିବା ସହିତ ଉଜ୍ଜ୍ୱଳ ଭବିଷ୍ୟତ କାମନା କରିଥାଏ । ପ୍ରତିଦାନରେ ଭାଇଟି ସାରା ଜୀବନ ପାଇଁ ଭଉଣୀକୁ ସୁରକ୍ଷା ଦେବାର ପ୍ରତିବଦ୍ଧତା ଆମ ସଂସ୍କୃତିକୁ ଋଦ୍ଧୀମନ୍ତ କରିଆସିଛି ବୋଲି ଶ୍ରୀ ଦତ୍ତ କହିଥିଲେ । ପରେ ଦଳର ମହିଳା ମୋର୍ଚ୍ଚାର ସଦସ୍ୟାମାନେ ଦେଶ ରକ୍ଷାରେ ବଳିଷ୍ଠ ଅବଦାନ ଦେଇଥିବା ପୂର୍ବତନ ସୈନିକମାନଙ୍କ ହାତରେ ରାକ୍ଷୀ ବାନ୍ଧିବା ସହିତ ମିଠା ଖୁଆଇଥିଲେ । ମହିଳାମାନେ ଭାରତୀୟ ଐତିହ୍ୟ ଓ ପରମ୍ପରାକୁ ମନେ ପକାଇ ସେମାନଙ୍କର ଆର୍ଶୀବାଦ ଲୋଡିଥିଲେ । ଅନ୍ୟମାନଙ୍କ ମଧ୍ୟରେ ବିଜେପି ରାଜ୍ୟ କାର୍ଯ୍ୟକାରିଣୀ ସଦସ୍ୟ ପର୍ଶୁରାମ ବେହେରା, ବରିଷ୍ଠ ନେତା ଗୌରାଙ୍ଗ ଦାସ, ଗଙ୍ଗାଧର ରାଉତ,ରାଜେନ୍ଦ୍ର ଚଟର୍ଜି,ଲୋକନାଥ ଭୂୟାଁ,ସୀତାକାନ୍ତ ସ୍ୱାଇଁ,ବିବେକାନନ୍ଦ ରାଉତ, ବିକାଶ ପାଢ଼ୀ,ସୌଭାଗ୍ୟ ମାନସ ନାୟକ,ସସ୍ମିତା ଦାଶ,ରଞ୍ଜିତ ପୃଷ୍ଟି, ସୁକାନ୍ତି ଦେବଗୋସ୍ୱାମୀ,ସନ୍ତୋଷ ଦେ, ଝରଣା ଦାସ,ନିରୁପମା ଦାଶ,ରୋଜାଲିନ ପାଣି,ନଜମା ବିବି,ମଧୁଶ୍ରୀ ପଣ୍ଡା,ସସ୍ମିତା ପଣ୍ଡା ଆଦି ବହୁ କାର୍ଯ୍ୟକର୍ତା ଏହି କାର୍ଯ୍ୟକ୍ରମରେ ଉପସ୍ଥିତ ଥିଲେ ।