ବୁଆଁଳ ପଂଚାୟତରେ ନୂତନ ପ୍ରକଳ୍ପ ନିର୍ମାଣ କାର୍ଯ୍ୟର ଶିଳାନ୍ୟାସ କଲେ ସଦର ବିଧାୟକ ମାନସ କୁମାର ଦତ, ପଂଚାୟତର ନୂଆପୁର ଠାରେ ନୂତନ ବ୍ରିଜ ନିର୍ମାଣ ପାଇଁ ଗ୍ରାମ୍ୟ ଉନ୍ନୟନ ବିଭାଗକୁ ଦେଲେ ପ୍ରସ୍ତାବ ;

ବାଲେଶ୍ୱର ସଦର ନିର୍ବାଚନମଣ୍ଡଳୀର ସର୍ବାଙ୍ଗୀନ ଉନ୍ନତି ପାଇଁ ନିର୍ବାଚନ ସମୟରେ ସଦର ବିଧାୟକ ମାନସ କୁମାର ଦତ ଦେଇଥିବା ପ୍ରତିଶୃତି ଅନୁଯାୟୀ ଜନସାଧାରଣଙ୍କ ଆବଶ୍ୟକତା ପୂରଣ ନିମନ୍ତେ ଉଦ୍ୟମ ଜାରି ରଖିଛନ୍ତି । ଏହି କ୍ରମରେ ବୁଆଁଳ ପଂଚାୟତର ନୂଆପୁର ଠାରେ ପ୍ରସ୍ତାବିତ ନୂତନ କମ୍ୟୁନିଟି ସେଂଟର ନିର୍ମାଣ ପ୍ରକଳ୍ପର ସେ ଶୁଭ ଦେଇଥିଲେ । ବିଧାୟକ ହାତ ପାଣ୍ଠି ଅନୁଦାନରେ ନୂଆପୁର ହରିସଭା ଠାରେ ଏହି କମ୍ୟୁନିଟି ସେଂଟର ନିର୍ମାଣ ହେବ । ଏଥିପାଇଁ ୨୦୨୩-୨୪ ଆର୍ôଥକ ବର୍ଷ ଅନୁଦାନରେ ୨ଲକ୍ଷ ଟଙ୍କା ମଞ୍ଜୁର ହୋଇଛି ।

ଏହି ପ୍ରକଳ୍ପକୁ ସମୟସୀମା ମଧ୍ୟରେ ଶେଷ କରିବା ପାଇଁ ଅଧିକାରୀ ଓ ଠିକାଦାରଙ୍କୁ ବିଧାୟକ ଶ୍ରୀ ଦତ୍ତ ନିର୍ଦ୍ଦେଶ ଦେଇଛନ୍ତି । ବାଲେଶ୍ୱର ସହରର ଉତ୍ତରରେ ଥିବା ବୁଆଁଳ ପଂଚାୟତରୁ ସିଧାସଳଖ କୌଣସି ଗମନାଗମନ ସୁବିଧା ନଥିବାରୁ ନୂଆପୁର ଠାରେ ବୁଢାବଳଙ୍ଗ ନଦୀ ଉପରେ ଏକ ନୂତନ ବ୍ରିଜ ନିର୍ମାଣ ପାଇଁ ବିଧାୟକ ଶ୍ରୀ ଦତ୍ତ ଗ୍ରାମ୍ୟ ଉନ୍ନୟନ ବିଭାଗ ଅଧିକାରୀଙ୍କୁ ପ୍ରସ୍ତାବ ଦେଇଛନ୍ତି । ଏହି ବ୍ରିଜ୍ ନିର୍ମାଣ ହେବା ଦ୍ୱାରା ବୁଆଁଳ ପଂଚାୟତ ସିଧାସଳଖ ବାଲେଶ୍ୱର ସହର ସହ ସଂଯୋଗ ହୋଇପାରିବ । ଫଳରେ ବୁଆଁଳରୁ ନୂଆପୁର ଦେଇ ବାଲେଶ୍ୱର ସହରର ମାଣିଖମ୍ବ ପର୍ଯ୍ୟନ୍ତ ପ୍ରାୟ ୧୦କିଲୋମିଟର ରାସ୍ତା କମିଯିବ । ଏହି ପ୍ରକଳ୍ପ କାର୍ଯ୍ୟକାରୀ ହେଲେ ବୁଆଁଳ ସହ ଆଖପାଖ ପଂଚାୟତବାସୀ ବହୁମାତ୍ରାରେ ଉପକୃତ ହେବେ ବୋଲି ବିଧାୟକ ଶ୍ରୀ ଦତ୍ତ ଆଶା ପ୍ରକାଶ କରିଛନ୍ତି । ଅନ୍ୟମାନଙ୍କ ମଧ୍ୟରେ ଗ୍ରାମ୍ୟ ଉନ୍ନୟନ କନିଷ୍ଠ ଯନ୍ତ୍ରୀ, ଜିଲ୍ଲା ପରିଷଦ ସଦସ୍ୟ ଗୟାଧର ବେହେରା, ବରିଷ୍ଠ ନେତା ରବି ନାରାୟଣ ମହାପାତ୍ର, ବୁଆଁଳ ସରପଂଚ ଜିତେନ ଯେନା, ସମିତି ସଭ୍ୟ ମାୟାଧର ମହାଳିକ, ସ୍ଥାନୀୟ ୱାର୍ଡ ସଭ୍ୟା ଶ୍ରାବଣୀ ବେହେରା, ଗୌରାଙ୍ଗ ଦାସ, କାହ୍ନୁ ମହାଳିକ ପ୍ରମୁଖଙ୍କ ସହ ବହୁ ଗ୍ରାମବାସୀ ଉପସ୍ଥିତ ଥିଲେ ।