ଭୁବନେଶ୍ୱର: ଇନର ହ୍ୱିଲ୍ କ୍ଲବ୍ ଭୁବନେଶ୍ୱର ଟେମ୍ପଲ୍ ସିଟି ପକ୍ଷରୁ ଇନର ହ୍ୱିଲ୍ ଡିଷ୍ଟ୍ରିକ୍ଟ ୩୨୬ର ଡିଷ୍ଟ୍ରିକ୍ଟ ଚେୟାରମ୍ୟାନ୍ ଡା. ମଞ୍ଜୁଷା ବୈଶମ୍ପାୟନଙ୍କ ଆଧିକାରିକ କ୍ଲବ୍ ପରିଦର୍ଶନ କାର୍ଯ୍ୟକ୍ରମ ସଫଳତାର ସହ ସମ୍ପନ୍ନ ହୋଇଛି।
ପରିଦର୍ଶନର ଅଂଶ ଭାବେ ଡା. ମଞ୍ଜୁଷା ବୈଶମ୍ପାୟନ ଥେରାହୋମ୍ ପରିଦର୍ଶନ କରିଥିଲେ। ଏଠାରେ ଅଟିଜମ୍ ସ୍ପେକ୍ଟ୍ରମ୍ରେ ଥିବା ଶିଶୁମାନେ ଇନର ହ୍ୱିଲ୍ କ୍ଲବ୍ ଭୁବନେଶ୍ୱର ଟେମ୍ପଲ୍ ସିଟିର ସହଯୋଗରେ ନିୟମିତ ଥେରାପି ଗ୍ରହଣ କରୁଛନ୍ତି। ସେ ଶିଶୁମାନଙ୍କ ସହ ଭାବବିନିମୟ କରିବା ସହ ସେମାନଙ୍କ ଥେରାପି ଓ ଶିକ୍ଷାଗତ ଆବଶ୍ୟକତା ପୂରଣ ଦିଗରେ କ୍ଲବ୍ ପକ୍ଷରୁ ଜାରି ରହିଥିବା ପ୍ରୟାସକୁ ପ୍ରଶଂସା କରିଥିଲେ।
ଏହି ଅବସରରେ କ୍ଲବ୍ ପକ୍ଷରୁ ସାବିତ୍ରୀଙ୍କୁ ତାଙ୍କ ଶିକ୍ଷାଗତ ଆବଶ୍ୟକତା ପାଇଁ ମାସିକ ଆର୍ଥିକ ସହାୟତା ପ୍ରଦାନ କରାଯାଇଥିଲା। ଏଥିସହ ଅନଗ୍ରସର ପରିବାରରୁ ଆସିଥିବା ଦୁଇଜଣ ଜାତୀୟସ୍ତରୀୟ କ୍ରୀଡ଼ାବିତ୍ଙ୍କୁ ସେମାନଙ୍କ କ୍ରୀଡ଼ା ପ୍ରତିଭାର ବିକାଶ ଏବଂ ଭବିଷ୍ୟତରେ କ୍ରୀଡ଼ା କ୍ଷେତ୍ରରେ ଆଗକୁ ବଢ଼ିବା ପାଇଁ ଆବଶ୍ୟକୀୟ କ୍ରୀଡ଼ା ସାମଗ୍ରୀ ପ୍ରଦାନ କରାଯାଇଥିଲା।
ଡା. ବୈଶମ୍ପାୟନ କ୍ଲବ୍ର ବିଭିନ୍ନ ସେବାମୂଳକ କାର୍ଯ୍ୟକ୍ରମର ପ୍ରଶଂସା କରିବା ସହ ସମାଜସେବା ପ୍ରତି ସଦସ୍ୟମାନଙ୍କ ନିଷ୍ଠା ଓ ପ୍ରତିବଦ୍ଧତାକୁ ସାଧୁବାଦ ଜଣାଇଥିଲେ। ଆବଶ୍ୟକତା ଥିବା ଲୋକମାନଙ୍କ ଜୀବନରେ କ୍ଲବ୍ ପକ୍ଷରୁ ଆଣିପାରୁଥିବା ସକାରାତ୍ମକ ଓ ଅର୍ଥପୂର୍ଣ୍ଣ ପରିବର୍ତ୍ତନକୁ ସେ ପ୍ରଶଂସା କରିଥିଲେ।
ଏହି ଆଧିକାରିକ ପରିଦର୍ଶନରେ କ୍ଲବ୍ର ବହୁ ସଂଖ୍ୟକ ସଦସ୍ୟା ଉପସ୍ଥିତ ରହି ଏହାକୁ ଏକ ଉଷ୍ମ ଓ ଅର୍ଥପୂର୍ଣ୍ଣ ସମାବେଶରେ ପରିଣତ କରିଥିଲେ। ସେବା, ସମବେଦନା ଓ ସାମୂହିକ ପ୍ରୟାସ ମାଧ୍ୟମରେ “Grow and Flourish” ବା “ବିକଶିତ ହେବା ଓ ବିକଶିତ କରିବା” ଭାବଧାରାକୁ ଆଗେଇ ନେବା ସହ ସମାଜସେବା ପ୍ରତି ନିଜର ପ୍ରତିବଦ୍ଧତାକୁ କ୍ଲବ୍ ପୁନର୍ବାର ଦୃଢ଼ କରିଥିଲା।
About the Author
