ବଲିଉଡର ଭାଇଜାନ ସଲମାନ ଖାନ । ଏହି ନାଁ ହିଁ କାଫି ତାଙ୍କ ପରିଚୟ ପାଇଁ । ସଲମାନ ଖାନଙ୍କ ନାଁ ଏବେ ଅନେକ ବଡ଼ ଫିଲ୍ମ ସହ ଯୋଡ଼ି ହେଉଛି । ଖୁବଶୀଘ୍ର ସେ ଏହି ଫିଲ୍ମଗୁଡ଼ିକର ଘୋଷଣା କରିପାରନ୍ତି । ଚଳିତ ବର୍ଷ ତାଙ୍କର ମାତୃଭୂମି ରିଲିଜ୍ ହେବାର ଥିଲା, କିନ୍ତୁ ଏହା ଏବେ ଅଟକି ରହିଛି । ଆସନ୍ତା ବର୍ଷ ସୁଦ୍ଧା ଫିଲ୍ମଟି ରିଲିଜ୍ ହୋଇପାରେ ବୋଲି ଚର୍ଚ୍ଚା ହେଉଛି ।
ଏବେ ସଲମାନ ଖାନଙ୍କ ସମ୍ପୂର୍ଣ୍ଣ ଫୋକସ୍ ତାଙ୍କର ପରବର୍ତ୍ତୀ ଫିଲ୍ମ ଉପରେ ରହିଛି । ଏହି ଫିଲ୍ମକୁ ବାମ୍ସୀ ପେଡିପଲ୍ଲୀ ନିର୍ଦ୍ଦେଶନା ଦେଉଛନ୍ତି । ଦିଲ୍ ରାଜୁଙ୍କ ସହ ଏହା ସଲମାନଙ୍କର ଏକ ବଡ଼ କୋଲାବୋରେସନ୍ । ଏହି ଫିଲ୍ମରେ ନୟନତାରା ଫିମେଲ୍ ଲିଡ୍ ଭାବେ ଅଭିନୟ କରୁଛନ୍ତି । ବର୍ତ୍ତମାନ ଫିଲ୍ମର ସୁଟିଂ ଚାଲିଛି ।
ଏହି ସମୟରେ ସଲମାନ ଖାନଙ୍କ ବଡି ଡବଲ୍ ଭାବେ କାମ କରୁଥିବା ପରଭେଜ୍ କାଜିଙ୍କ ସ୍ୱାସ୍ଥ୍ୟ ଖରାପ ହୋଇପଡ଼ିଛି । ଏହା ଜାଣିବା ପରେ ଭାଇଜାନ୍ ତାଙ୍କ ସହାୟତା ପାଇଁ ଆଗକୁ ଆସିଛନ୍ତି । ପରଭେଜ୍ ତାଙ୍କ ଆଗାମୀ ଫିଲ୍ମ, ଯାହାର ଟାଇଟଲ୍ ମନଷ୍ଟର ବୋଲି କୁହାଯାଉଛି, ତାହାର ସୁଟିଂ ସମୟରେ ଅସୁସ୍ଥ ହୋଇପଡ଼ିଥିଲେ ।
ନିକଟରେ ପ୍ରକାଶିତ ଏକ ରିପୋର୍ଟରୁ ଜଣାପଡ଼ିଛି ଯେ, ଅଗଷ୍ଟ ୬ ତାରିଖରେ ପରଭେଜ୍ କାଜି ଘରେ ଥିବା ସମୟରେ ଅସୁସ୍ଥ ଅନୁଭବ କରିଥିଲେ । ପରେ ତାଙ୍କର ଏକ ଛୋଟ ସର୍ଜରୀ ହୋଇଥିଲା । ଯେତେବେଳେ ସଲମାନ ଏହି ବିଷୟରେ ଜାଣିଲେ, ସେ ନିଜେ ଆଗକୁ ଆସି ସବୁକିଛି ଦେଖାଶୁଣା କରିଥିଲେ । କାଜିଙ୍କ ଚିକିତ୍ସା ଠିକ୍ ଭାବେ ହେଉଛି କି ନାହିଁ, ସଲମାନ ନିଜେ ନିଶ୍ଚିତ କରୁଛନ୍ତି । ପରଭେଜ୍ କାଜିଙ୍କ ମ୍ୟାନେଜର ପୀୟୁଷ ସ୍ପଷ୍ଟ କରିଛନ୍ତି ଯେ, ତାଙ୍କୁ ହାର୍ଟ ଆଟାକ୍ ହୋଇନଥିଲା । ପୂର୍ବରୁ ଆସିଥିବା ଏହି ଖବର ଭୁଲ୍ ଥିଲା ।
ସଲମାନଙ୍କ ବଡି ଡବଲ୍ଙ୍କ ସ୍ୱାସ୍ଥ୍ୟରେ ସୁଧାର:
ରିପୋର୍ଟ ଅନୁସାରେ ପରଭେଜ୍ କାଜିଙ୍କ ସ୍ୱାସ୍ଥ୍ୟରେ ଏବେ ସୁଧାର ଆସୁଛି । ପ୍ରଥମେ ଘରେ ଥିବାବେଳେ ତାଙ୍କୁ ଭଲ ଲାଗୁନଥିଲା । ଏହାପରେ ସେ ମେଡିକାଲ୍ ଚେକ୍ଅପ୍ ପାଇଁ ଯାଇଥିଲେ । ଅନେକ ପରୀକ୍ଷା ପରେ ତାଙ୍କୁ ହସ୍ପିଟାଲ୍ରେ ଭର୍ତ୍ତି କରାଯାଇଥିଲା । ସେଠାରେ ତାଙ୍କର ଏକ ଛୋଟ ହାର୍ଟ ସର୍ଜରୀ ହୋଇଥିଲା । କାଜିଙ୍କ ସ୍ୱାସ୍ଥ୍ୟ ବିଷୟରେ ଜାଣିବା ମାତ୍ରେ ସଲମାନ ଖାନ ତୁରନ୍ତ ସହାୟତା ପାଇଁ ଆଗକୁ ଆସିଥିଲେ । କାଜିଙ୍କ ଚିକିତ୍ସା ସମେତ ସମସ୍ତ ଦାୟିତ୍ୱ ସେ ନିଜେ ନେଇଥିଲେ ।
ନିଜ ଷ୍ଟଣ୍ଟ ନିଜେ କରିବେ ସଲମାନ:
ପ୍ରଥମେ ଖବର ଆସିଥିଲା ଯେ ପରଭେଜ୍ କାଜି ସୁଟିଂ ସେଟ୍ରେ ହାର୍ଟ ଆଟାକ୍ର ଶିକାର ହୋଇଥିଲେ । କାଜି ସୁସ୍ଥ ହେବା ପର୍ଯ୍ୟନ୍ତ ସଲମାନ ନିଜେ ଆକ୍ସନ୍ ସିନ୍ କରିବେ ବୋଲି ମଧ୍ୟ ଚର୍ଚ୍ଚା ହୋଇଥିଲା । ଏହାସହ ଷ୍ଟଣ୍ଟ ସିଡ୍ୟୁଲ୍ରେ ମଧ୍ୟ ପରିବର୍ତ୍ତନ କରାଯାଇଛି ।
About the Author
